Inter – Milan: jonli efir (23.11.2025)

“Juzeppe Meatsza” arenasida A Seriyaning 12-turi o‘z yakuniga yetar ekan, kunning asosiy voqeasi — “Inter” va “Milan” o‘rtasidagi tarixiy derbi bo‘lib o‘tadi. Uchrashuv 23-dan 24 noyabrga o‘tar kechasi, Toshkent vaqti bilan soat 00:45 da boshlanadi. Demak, 264-bor o‘tkazilayotgan bu duel yana bir bor Lombardiya poytaxtini ikki lagerga bo‘ladi: tong ottirgacha quvonadiganlar va mag‘lubiyat iztirobi bilan uxlay olmaydiganlar.

Mezbonlar bahsga turnir jadvalining yetakchisi sifatida kirib kelmoqda — ular “Roma” bilan birinchi o‘rinni bo‘lishmoqda. Har ikkala klubda 24 ochko bor, biroq gol ko‘rsatkichlari keskin farq qiladi. Kristian Kivu jamoasi 11 o‘yinning 8 tasida g‘alaba qozongan, 26 ta gol bilan chempionatning eng kuchli hujumiga ega va raqiblardan gol farqi bo‘yicha ancha oldinda. Shaharni “qizil-qora” rangda himoya qilayotgan “Milan” esa atigi 2 ochko ortda va 3-o‘rinda bormoqda. Massimiliano Allegri jamoasi faqat bir bor mag‘lub bo‘lgan, himoyadagi barqarorlikni va hujumdagi faol o‘yinni muvaffaqiyatli birlashtirib kelmoqda. Biroq mehmonlar ba’zan yaratilgan vaziyatlarni golga aylantirishda qiynaladi — to‘rt marta durang o‘ynashgan.

Qayerda tomosha qilish mumkin?

Milan derbisini O‘zbekistonda bir nechta platformalarda kuzatish mumkin. UzReport agentligining markaziy kanali — Football TV — ochiq litsenziya asosida A Seriyaning barcha o‘yinlarini efirga uzatishda davom etmoqda. Setanta Sport+ esa odatdagidek haftaning eng prinsipal, skudetto uchun kurashayotgan jamoalar ishtirokidagi o‘yinlarni tanlab namoyish qiladi. Shubhasiz, “neradzurri” va “rossoneri” o‘rtasidagi duel ham shu ro‘yxatda.